ایشیا کپ کی غیر یقینی صورتحال میں پی سی بی کا سہ فریقی سیریز کی منصوبہ بندی ایک بروقت فیصلہ-
ایشیا کپ 2025 کے انعقاد پر جاری غیر یقینی صورتحال اور بھارت و پاکستان کے درمیان بڑھتی ہوئی کشیدگی کے پیش نظر پاکستان کرکٹ بورڈ (پی سی بی) نے سہ فریقی ٹی ٹوئنٹی سیریز کے انعقاد پر غور شروع کر دیا ہے۔ اس مجوزہ ٹورنامنٹ میں پاکستان، افغانستان اور متحدہ عرب امارات (یو اے ای) کی ٹیمیں شامل ہوں گی۔ پی سی بی کا یہ قدم ایک حکمتِ عملی کے طور پر دیکھا جا رہا ہے، جس کا مقصد اپنی ٹیم کو متبادل مقابلوں کے ذریعے تیار رکھنا ہے، تاکہ اگر ایشیا کپ منعقد نہ ہو سکے تو کھلاڑیوں کو بین الاقوامی معیار کے میچز کھیلنے کا موقع مل سکے۔
بھارتی کرکٹ بورڈ (بی سی سی آئی) کی جانب سے ایشیا کپ میں شرکت یا اس کی میزبانی سے انکار کے بعد، ٹورنامنٹ کے انعقاد پر سوالیہ نشان لگ گیا ہے۔ بھارت اور سری لنکا کو اس ایونٹ کی میزبانی کرنی تھی، تاہم حالیہ سیاسی حالات نے صورتحال کو پیچیدہ بنا دیا ہے۔ ایسی صورتِ حال میں مالی اور انتظامی چیلنجز کے سبب ایشیا کپ منسوخ یا ملتوی ہونے کا خدشہ پیدا ہو چکا ہے، جس سے خطے میں کرکٹ کے شائقین کو مایوسی ہو سکتی ہے۔
ایسے حالات میں پی سی بی کا سہ فریقی سیریز کا منصوبہ ایک دانشمندانہ قدم محسوس ہوتا ہے۔ افغانستان کی ٹیم ویسے ہی پاکستان کے دورے پر آنے والی ہے، اور اگر یو اے ای کی شمولیت بھی ممکن ہو جائے تو اس سیریز سے کھلاڑیوں کو قیمتی تجربہ حاصل ہو سکتا ہے۔ یہ سیریز نہ صرف پاکستان کے لیے تیاری کا موقع ہوگی بلکہ دیگر ٹیموں کے لیے بھی کھیل کا تسلسل برقرار رکھنے کا ذریعہ بن سکتی ہے۔ اگرچہ ابھی کچھ بھی حتمی نہیں، لیکن ایسی کوششیں کرکٹ کے مفاد میں ایک مثبت پیش رفت سمجھی جا سکتی ہیں۔
Comments
Post a Comment