سائمہ سلیم سے آرمی چیف کی ملاقات عزم، ہنر اور حب الوطنی کی روشن علامت۔
فیلڈ مارشل سید عاصم منیر، چیف آف آرمی اسٹاف، نے اقوام متحدہ میں پاکستان کی نمائندہ سائمہ سلیم سے ایک نہایت مثبت اور حوصلہ افزا ملاقات کی۔ سائمہ سلیم، جو بصارت سے محروم ہیں، اپنی انتھک محنت، دانش مندی اور سفارتی مہارت سے عالمی سطح پر پاکستان کی موثر ترجمانی کر رہی ہیں۔ آرمی چیف نے ان کی خدمات، جذبے اور غیر معمولی کارکردگی کو سراہا اور انہیں ملک کا قابل فخر اثاثہ قرار دیا۔
اس ملاقات میں جنرل عاصم منیر نے سائمہ سلیم کی استقامت اور عزم کو قومی مثال قرار دیا، جو نہ صرف معذور افراد بلکہ پوری قوم کے لیے باعثِ تحریک ہے۔ انہوں نے یقین دلایا کہ پاک فوج خصوصی افراد کو قومی ترقی میں مؤثر کردار ادا کرنے کے لیے ہر ممکن تعاون فراہم کرتی رہے گی، تاکہ معاشرے کا ہر فرد اپنی صلاحیتوں کے مطابق آگے بڑھ سکے۔
سائمہ سلیم نے آرمی چیف کو اقوام متحدہ میں اپنی ذمہ داریوں اور پاکستان کو درپیش چیلنجز پر تفصیل سے آگاہ کیا۔ آرمی چیف نے علاقائی و عالمی سطح پر بھارتی ریاستی دہشت گردی جیسے حساس مسائل پر پاکستان کے مؤقف کو اجاگر کرنے میں ان کی کوششوں کو سراہا۔ ملاقات کے اختتام پر سائمہ سلیم نے اپنی ادبی تخلیقات بھی پیش کیں، جو ان کی علمی و فکری گہرائی کی عکاسی کرتی ہیں۔ یہ ملاقات پاکستان کے باصلاحیت شہریوں کی صلاحیتوں کو سراہنے اور ان کی حوصلہ افزائی کا ایک روشن استعارہ ہے۔
Comments
Post a Comment