ہنگور کلاس آبدوزیں پاکستان نیوی کی سمندری طاقت میں ایک نیا باب۔
پاکستان نیوی نے 15 اگست 2025 کو چین میں اپنی تیسری ہنگور کلاس آبدوز "پی این ایس منگرو" کی لانچنگ کا اعلان کیا، جو پاکستان کی بحری دفاعی صلاحیتوں میں ایک اور اہم اضافہ ہے۔ اس تقریب کا انعقاد ووچانگ شپ بلڈنگ انڈسٹری گروپ، ووہان میں ہوا، جس میں پاک بحریہ کے وائس ایڈمرل عبدالصمد نے بطور مہمان خصوصی شرکت کی۔ انہوں نے موجودہ جیو-اسٹریٹیجک صورتحال کے تناظر میں میری ٹائم سیکیورٹی کی اہمیت پر زور دیا اور پاک چین دفاعی تعاون کو سراہا۔ یہ پیش رفت نہ صرف پاکستان کی عسکری صلاحیتوں میں بہتری کا اشارہ ہے، بلکہ چین کے ساتھ تکنیکی اشتراک کی ایک کامیاب مثال بھی ہے۔
ہنگور کلاس آبدوزوں کا منصوبہ، جس کے تحت آٹھ آبدوزیں بنائی جا رہی ہیں، چار چین اور چار پاکستان میں، ٹیکنالوجی کی منتقلی کے عمل کو فروغ دیتا ہے۔ اس پروگرام کے تحت کراچی شپ یارڈ میں آبدوزوں کی مقامی تیاری، نہ صرف دفاعی خود کفالت کی جانب ایک بڑا قدم ہے بلکہ مقامی انجینئرنگ اور ہنر مند افرادی قوت کی صلاحیتوں کو بڑھانے کا موقع بھی فراہم کرتا ہے۔ اگرچہ آبدوزوں کے ہتھیاروں یا نظاموں کی تفصیلات سرکاری طور پر جاری نہیں کی گئیں، لیکن مبصرین کا خیال ہے کہ یہ آبدوزیں جدید اسلحہ اور سنسرز سے لیس ہوں گی، جو پاکستان کی زیرِ سطح دفاعی صلاحیتوں کو نمایاں طور پر بہتر کریں گی۔
اس منصوبے کی کامیابی سے پاکستان کو خطے میں اپنی A2/AD (Anti-Access/Area Denial) صلاحیتوں کو مضبوط کرنے میں مدد ملے گی۔ اگر ان آبدوزوں میں بابر-3 میزائلوں کو شامل کیا گیا تو پاکستان کو گہرائی تک مار کرنے کی قابلِ ذکر صلاحیت حاصل ہو سکتی ہے، جو خطے میں تزویراتی توازن کو برقرار رکھنے کے لیے اہم ہو گا۔ گوکہ منصوبے میں کچھ تاخیر ہوئی ہے، تاہم حالیہ لانچنگ اس بات کا اشارہ ہے کہ پاکستان نیوی مستقبل کی جنگی ضروریات کے لیے اپنی تیاریوں کو جدید خطوط پر استوار کرنے کے لیے پرعزم ہے۔
Comments
Post a Comment