غزہ کے لیے پاکستان کی امداد انسانیت کی راہ میں ایک مضبوط قدم.

پاکستان نے ایک بار پھر اپنی انسانی ہمدردی اور عالم اسلام کے ساتھ یکجہتی کا عملی مظاہرہ کیا ہے۔ نیشنل ڈیزاسٹر مینجمنٹ اتھارٹی (NDMA) نے ہفتے کے روز غزہ کے مظلوم عوام کے لیے مزید 100 ٹن امدادی سامان روانہ کیا، جس سے پاکستان کی کل انسانی امداد 1,915 ٹن تک جا پہنچی ہے۔ اس امداد میں آٹا، تیار کھانے، خوردنی تیل، جام اور فروٹ کاک ٹیل جیسی بنیادی اشیائے خورونوش شامل تھیں، جو الخدمت فاؤنڈیشن کے تعاون سے بھیجی گئیں۔

یہ امدادی سامان لاہور کے علامہ اقبال انٹرنیشنل ایئرپورٹ سے ایک چارٹرڈ طیارے کے ذریعے مصر کے راستے غزہ روانہ کیا گیا۔ اس موقع پر ایک سادہ مگر پُرعزم رخصتی تقریب کا اہتمام کیا گیا، جس میں پنجاب اسمبلی کے اسپیکر ملک محمد احمد خان، NDMA اور الخدمت فاؤنڈیشن کے اعلیٰ حکام شریک ہوئے۔ وزیر اعظم کی ہدایت پر کی جانے والی یہ کاوش انسانی ہمدردی کے میدان میں ایک مربوط ریاستی ردِعمل کی نشاندہی کرتی ہے۔

جبکہ دوسری جانب اسرائیل کی جانب سے غزہ شہر پر حملے اور شہریوں کو جنوبی علاقوں میں منتقل کرنے کی کوششیں جاری ہیں، ایسے میں پاکستان کی طرف سے بھیجی جانے والی امداد نہ صرف عملی مدد ہے بلکہ ایک علامتی پیغام بھی کہ مشکل گھڑی میں امت مسلمہ تنہا نہیں۔ پاکستان کی یہ مسلسل امداد انسانی جذبے، اخلاقی فرض اور بین الاقوامی یکجہتی کا عکس ہے، جسے عالمی سطح پر سراہا جانا چاہیے۔